قلب الاسود

بعد موت أمي أبويا راح اتجوز واحدة تانية وكان الكل متوقع إنها هتسخرني تحت رجليها وتخليني خدامة، خاصةً إني كنت بتاعت مشاكل من صغري وكنت رافضة لفكرة إن تكون ليا أم تانية مهما حصل، بس اللي حصل كان عكس المتوقع، وجت مرات أبويا وبقت بتحاول تكسبني وتعاملني وكأني بنتها بالظبط.

 

بس من جوايا مقدرتش أتقبلها رغم إنها عملت المستحيل عشان تكسبني، أمي علمتني إن مينفعش حد ياخد منك حاجة، وأنا مكنتش عاوزاها تاخد أبويا مني، ولا تخلف من أبويا وياخدوا البيت مني، كل ده كان بيدور في عقلي وأنا لسة بنت ١٤ سنة، وأعلنت عليها الحرب لسنين طويلة..

 

كنت بطلع فوق سطح البيت أخنق الطيور بتاعتها، كنت كل يوم اشتكي منها لأبويا إنها بتضربني وتعذبني، كنت بتلكك عشان أعيط وأصرخ وأفضح الدنيا، بس هي كانت زي الجبل متحملة بطريقة غير مفهومة وساكتة، لحد ما حملت وخلفت، وكرهتها أكتر وأكتر هي وابنها، كرهتهم أكتر من أي حاجة في الدنيا..

 

كل ما كانت الشهور بتعدي وابنها بيتحرك كنت بكره نفسي وحركاته وصوته، لحد ما الشيطان أعماني تمامًا وخليته مرة على السطح وزقيته، ونزلت أوضتي ولا كأن حاجة حصلت، لحد ما سمعت الصريخ في الشارع وجريت مع الناس ومات الطفل الصغير، وحزنت أمه عليه حزن لدرجة إنها فقدت الشغف في الحياة..

 

كانت بتموت قدامي بالبطيء، كنت بفرح لما بشوفها بالحالة دي، واحدة جاية تاخد مني أبويا يبقا لازم تتعاقب، وماتت في النهاية مقهورة وأنا اتخطبت واتجوزت..

 

ست شهور بالظبط ومن كتر مشاكلي مع حماتي اتطلقت، ورجعت لأبويا اللي بقا بيشوفني وكأني شيطانة عايشة في الحياة، كان بيقول إني ورثت سواد القلب من أمي، بس مكنتش بهتم، المهم محدش ياخد مني حاجة بتاعتي أبدًا..

 

وفضلت على الحال ده مكروهة من ناس كتير بسبب أسلوبي الفظ وأفعالي، وعدت السنين وعرفت إن ده مش لصالحي، أنا عايزة اتجوز تاني، ولازم اتعامل بطريقة مختلفة حتى لو همثل ده..

 

وفعلا بدأت أغير من طبعي وطريقة لبسي وكلامي، خاصة لما خرجت للشغل بعد ما أبويا عجز وبقا مش قادر يصرف على البيت، وفعلًا نجحت إني أرجع الناس ناحيتي تاني، وبقيت بجيب سيرة طلاقي كتير وأد أيه أنا كنت مظلومة واتحملت ما لا يتحمله بشر، لحد ما لفت نظر شخص كان شغال معانا في المصنع وقرر يتقدم ويخطبني..

 

كان أرمل ومخلف بنت صغيرة، ولما فاتحني أكدتله إني هشيل بنته في عنيا وأكتر كمان، وفعلًا صدقني وجه يتقدملي وأبويا وافق رغم إنه كان عارف إني مش هعمر معاه أبدًا..

 

ومن أول يوم دخلت على البنت بدأت أفتكر أول يوم دخلت عليا فيه مرات أبويا، هل المفترض أتعامل مع البنت زي ما كانت مرات أبويا بتتعامل معايا، ولا أعكس الموضوع وأنا اللي أتخلص منها بأي طريقة، أنا معايا ألف طريقة أقدر أتخلص بيها من أي شخص..

 

بس لما حاربت مرات أبويا زمان كان عشان جاية تاخد مني حاجة بتاعتي، دلوقتي أبوها المفترض ليها هي، لا، أبوها بيحبني، والمفترض كان يتجوزني أنا قبل أمها ويخلف مني أنا، أبوها ده بتاعي أنا وهي مينفعش تشاركني فيه إطلاقًا..

وبعد الجواز بأيام بدأت أجس نبض البنت الصغيرة، في البداية كانت واخدة أوامر من أبوها تسمع كلامي ومتعارضنيش في أي حاجة إطلاقًا، بس لما قسوت عليها بدأت تبلغ أبوها بأفعالي، وبدأت أشوف وش مُخيف منه، كانت الحاجة اللي غير مسموح بيها إني أجي جمبها بأي سوء..

 

قالها صراحة إنه مستعد يطلقني انهاردة قبل بكرة عشان خاطر بنته، عشان كدا كتمت في قلبي وسكت، بس سكوت شيطاني، مُخيف، سكوت ما قبل العاصفة زي ما بيقولوا، أنا بقيت عاوزة أتخلص منها انهاردة قبل بكرة، بقيت بكرهها زي ما كرهت مرات أبويا زمان، البنت دي عاوزة تاخد مني جوزي وده انا استحالة أسمح بيه أبدا.

 
لتكملة اضغط على الرقم ٢ 👇👇

1 2 3 4الصفحة التالية