جدتي الله يرحمها في فترة مرضها كانت مُقيمة عندنا في البيت علشان والدتي ترعاها لأن هي بنتها الوحيدة

 

في اللحظة ديه اترددت اني اكمل وفكرت ارجع ، بس رجعت اقول لنفسي طيب اشوف مين الشخص ده وبيعمل ايه قدام قبر جدتي

 

لما قربت اكتر اكتشفت أن اللي قاعد واحدة ست ، كان واضح من لبسها وهيأتها ، كانت مدياني ضهرها 

 

قربت منها وسألتها،

أنتي مين؟

وبتعملي ايه هنا؟

 

فا لقيتها بتلف وشها ناحيتي بهدوء وبتبصلي ، و أشوف قدامي جدتي هي اللي قاعدة،

 

اللي استغربته أني ماتخضتش ، رد فعلي كان طبيعي ، كلمتها بطريقة طبيعية وسألتها،

جدتي؟

أنتي بتعملي ايه هنا!!

 

ردت عليا وقالتلي ،

انت اللي بتعمل ايه هنا؟

بتسمع كلام الدجالين!! ده كفر

 

قولتلها وانا عيني بتدمع ،

يعني عاجبك امي ؟ 

عاجبك حالتها واللي بيحصل فيها؟

انا هعمل اي حاجة تخرجها من الحالة اللي هي فيها 

 

لقيتها بتتكلم بنوع من العصبية وبتقولي،

يابني امك تعبانة ، هو سهل على بني ادم يفقد امه وأبنه في يوم واحد؟

 

رديت عليها وقولتلها إبنه مين اللي بتتكلمي عنه؟ انا اخواتي زي الفل وانا واقف قدامك اهوه زي الفل،

 

فا لقيتها بتقولي ،

طول مانت مش عاوز تقتنع خلاص ان احنا تحت الأرض وهما فوق ، هتفضل زي ما انت ، فوق يابني انت بقيت في عالم الاموات ، لا انا ولا انت بقينا معاهم

 

قالت الكلام ده وبصت على اليافطة اللي محطوطة فوق قبرها ، بصيت انا كمان قرأت الكلام المكتوب 

 

“قبر المغفور لهم بإذن الله، وتحت الجملة ديه اسم جدتي رباعي، وتحت اسمها أسمي انا كمان رباعي”

 

تاريخ الوفاه ١٦/٧/٢٠١٧

 

الصفحة السابقة 1 2 3 4 5