“بكرا عندي حصة عملي في المشرحة اللي فيها الفنانة المشهورة داليا شاهين”. 

 

وقعت على المسرح وفضل جسمها يسيح ويتقطع بدون ما حد يمسها نهائي وكأن في نار خفية بتنهش فيها لكنها غير مرئية.

 

والأغرب من ده كله أن كاميرات الحفلة والجمهور كلها اتعطلت في وقت موتها ومفيش ولا صورة أو فيديو اتسرب للحدث وده اللي خلاها حديث المدينة أخر فترة. 

 

لما عرفت من مريم أنها هتقدر تدخل المشرحة اللي فيها داليا شاهين حسيت أن الحياة ضحكتلي لأني لو قدرت اجيب صورة واحدة ده هيخلي أسمي يلمع و يسمع جدًا وهتكون ضربة صحفية ممتازة. 

 

مترددتش لحظة وقولت لمريم وانا مفعم بالحماس والطاقة “طب ينفع اجيلك وتدخليني أو تاخديلي حتى صورتين للجثة؟ خطيبك شغله واقع وده هينفعني جامد ويمكن يجيلي مكافأة من الشغل”.

 

مريم كانت البنت الجدعة اللي عمرها ما رفضتلي طلب ولا خذلتني فيها وقالتلي “أي حاجة فيها مصلحتك اكيد هشاركك، لكن بالنص فيفتي فيفتي”.

 

مريم مَكنتش جدعة أوي يعني واضطريت أوافق على شرطها وقولتلها “موافق والله لو جالي مكافأة ليكي 50% بس تدخليني علشان أحاول اعمل فيديو بسيط كده على السريع وهخرج على طول”. 

 

وللأسف روحت للجحيم بنفسي. 

 

تاني ليلة نزلت الصبح بدري ومعايا الكاميرا ومعداتي في الشنطة ونطيت في أقرب اتوبيس ومعتبر نفسي رايح للعالمية برجلي. 

 

أول ما وصلت لقيت مريم منتظراني على باب المستشفى ولابسة البلطو الأبيض اللي مخليها تشبه الدب القطبي وقالتلي “يلا بسرعة قبل ما الدكتور يوصل”.

 

وخدتني على المشرحة ووقفت تبلغ صحبتها أنها تدينا تنبيه لو حد وصل وتخبطلنا على الباب علشان نلحق نخرج قبل ما حد يمسكنا. 

 

لبست بالطو زي مريم بحيث يعتبروني طالب في المستشفى زيهم، ودخلت وقفت في أوضة التلاجات اللي رهبتها مش محتاجة وصف فيها. 

 

سألت مريم بصوت واطي “هي في انهي درج بسرعة؟”

 

ردت مريم وقالتلي “وانا ايشعرفني دور معايا في الإدراج ولما تلاقي حاجة محروقة يبقى أكيد هي”.

 

بدأت مريم تفتح الإدراج بدون ذرة خوف منها وكأنها بتفتش في تموين البيت على باكو شاي، وعلشان مظهرش جبان قدامها حاولت اعمل زيها وفتحت أول درج بكل ثقة واعصاب رجلي سابت مني أول ما لقيت راس ست مفصولة عن جسمها وعيونها مفتوحين ولونها شاحب أبيض زي التلج. 

 

مريم بصت ناحيتي بلا مبالاة وهي بتقولي “كمل كمل هتتعود، هو في الأول كلنا بنخاف بعدين مشاعرك هتبقى بنفس برودة التلاجات دي”.

 

ويادوب لسه بقوم من مكاني لقيتها بتصرخ وبتسقف بحماس وهي بتقولي “ههييييي لقيتها لقيتها”.

 

في اللحظة دي أنا كنت جريت وخلاص على وشك الهروب وفتح الباب لولا أني استوعبت أنها بتصرخ من الفرحة مش من الخوف. 

 

قلعت الشنطة اللي على ضهري وطلعت الكاميرا اللي فيها وخليت مريم تمسكها وتوجها عليا ووقفت جنب جثة داليا اللي مازالت متغطية ومشوفتهاش وقولتلها “عدي واحد اتنين تلاتة وأول ما تبدأ تصوير شاوريلي علشان ابدأ”.

 

وبدأ صوت الكاميرا في العد التنازلي وشاورتلي مريم بحماس لأنها أول مرة تصور وكانت سعيدة بشكل مبالغ والضحكة مرسومة على وشها كأنها في رحلة مش في مشرحة وسط اموات. 

 

“السلام عليكم ورحمه الله وبركاته، أنا الصحفي محمد فكري ودلوقتي جايلكم ع السريع بخبر حصري قالب السوشيال ميديا وهو حكاية الفنانة “داليا شاهين” وموتها الغامض اللي متسجلش لأسباب مجهولة لكن دلوقتي أنا جاي علشان نشوف مع بعض الحقيقة وهل فعلاً ماتت محترقة زي ما بيقولوا، ولا في سبب تاني”.

 

لتكملة اضغط على الرقم ٣ 👇👇

الصفحة السابقة 1 2 3 4 5 6 7 8الصفحة التالية