“بكرا عندي حصة عملي في المشرحة اللي فيها الفنانة المشهورة داليا شاهين”. 

ويادوب بمد أيدي على المشمع اللي فوق الجثة علشان اكشفها.. حاجة مسكت في أيدي بقوة وسحبتني جوا التلاجة زي الدوامة اللي بقيت أصرخ فيها بأسم مريم اللي اختفت هي والمشرحة كلها ولقيت نفسي فجأة واقف في مكان شبه القرى الزراعية القديمة وواحدة ماسكة في رجلي وبتصرخ. 

 

ببص لقيتها واحدة ست قاعدة تحت شجرة ومتكتفة وبتقولي “فكني بسرعة، فكني هيقتلوني”.

 

في البداية اتخضيت وصرخت معاها وسألتها “مين دول اللي هيقتلوكي، واحنا فين اصلا وايه اللي جابني هنا”.

 

شاورتلي قدامها وقالتلي “دول”.

 

بصيت مكان ما بتشاور لقيت رجالة كتير وشهم ممسوخ بدون ملامح وبدون شعر وشكلهم مفزع ومرعب. 

 

ماسكين حجارة كتير في أيديهم وبدأوا يحدفوا بيها الست المربوطة في الشجرة وبدأت الحجارة تيجي عليا معاها. 

 

طلعت اجري وأنا بتفادى الحجارة وسبتها تصرخ ومبقتش فاهم أنا رايح فين ولا بعمل إيه هنا، وازاي الدنيا ضلمة أوي كده كأننا الفجر وأنا من شوية كنت الصبح في المشرحة.

 

دمي كان هربان من الخوف وفضلت أجري لحد ما لقيت بيت قديم وسط أرض زراعية فاضية وبابه مفتوح!

 

وقفت برا حاولت انده على أي حد ينجدني ويفهمني أي حاجة “يا أهل الله ياللي هنا.. في حد هنا؟”

 

سمعت صوت ضعيف جدًا بيقولي “اتفضل يابني”.

 

كان صوت لست عجوزة أول ما دخلت لقيتها قاعدة على كرسي ماسكة في خيوط بتشبكها في بعضها وضهرها محني ووشها في الأرض ونازل على وشها طرحة سودا.

 

وقفت قولتلها بخوف من هيئتها “لو سمحتي أحنا هنا فين؟”

 

ردت وقالتلي “في الدنيا”.

 

مَكنش ده وقت فلسفة نهائي وابتديت اتوتر اكتر وقولتلها “مانا فاهم يا حجة إننا في الدنيا مش الأخرة، بس فين بالظبط يعني؟ أنا عايز ارجع القاهرة فيصل تعرفيها؟”.

 

الست مَكنتش بتبص تجاهي ومستمرة في تشبيك الخيوط وقالتلي “معرفش يابني أنت عايز إيه بالظبط، عندك أكل في التلاجة لو جعان خش كُل متتكسفش”.

 

في البداية كنت شاكك فيها وخايف لكن بعد كلامها اتاكدت أنها ست عجوزة زي أجدادنا ومفيش داعي للخوف. 

 

قعدت على الكنبة اللي قصادها أخد أنفاسي وقولتلها “طب سيبك من القاهرة يا حجة، أنا كنت برا دلوقتي ولقيت ست مربوطة في شجرة والناس بيرموها بالحجارة وشكلهم مرعب مش بني ادمين زينا وملهمش ملامح”.

 

خرج منها صوت كأنها بتضحك وبتتهز وقالتلي “دي تلاقيها داليا”.

 

اتصدمت من سماع إسم الممثلة وسألتها “داليا شاهين الممثلة؟”.

 

ردت وقالتلي “لأ.. داليا سمير الطبيبة هنا في القرية”.

 

احترت من كلامها ونسيت كل اللي حصلي وسألتها “ودي الناس بيرجموها ليه بالشكل ده؟ أكيد أخطأت في عملها أو عملت مصيبة”

 

ردت وقالتلي كلام غريب أوي “أخطأت ولا مأخطاتش يابني هو أحنا اللي هنحاسب العباد؟ داليا مجرد طبيبة شاطرة ومشهورة وده سبب رجمها.. أصل الناجح بيكون عقبة في حياة الفشلة، وعلشان كده في قريتنا اللي بينجح بيرجموه ودي طقوس طبيعية يعني متحطش في بالك.. احطلك تاكل؟”.

 

حسيت إني دخلت فيلم عربي قديم وكنت بالفعل حاسس بهبوط ووافقت أنها تحطلي اكل. 

 

سابت ادوات الخياطة اللي في ايديها على جنب وقامت اتحركت بصعوبة للمطبخ وهي منحنية بنفس الشكل ورجعتلي بطبق محطوط عليه أيد بني أدم مقطوعة!؟

 

صرخت واتنفضت مكاني وانا بقولها “إيه اللي بيحصل ده، أنتي بتاكلي أعضاء بني ادمين”.

 

رفعتلي وشها من تحت الطرحة اللي كانت متخفية فيها وظهر وشها الممسوخ زي اللي شوفتهم قبلها وقالتلي “مهو ده غذانا يابني، بناكل في لحم اللي بينجح ودي أخر وجبة عندي يارب حد يفتكرني بحتة من الطبيبة”.

 

ومسكت اليد اللي في الطبق وبدأت تاكلها وهي بتقولي “شكلك جديد هنا، بكرا تتعود”.

 

بوقها كان بينزف دم وهي بتاكل بشراسة زي الحيوانات.

 

اعصابي متحملتش اللي بيحصل وفقدت الوعي في نفس اللحظة اللي حسيت بأيد بتتحرك على صدري وقومت أصرخ لقيتني نايم على سرير التشريح والطلاب كلهم حواليا مصدومين ومنهم اللي بيصرخ وخايفين والدكتور واقف في أيده المشرط وبيقولهم بهدوء “وعلشان الجثة ممكن تصحى زي ما حصل دلوقتي، بندب فيها المشرط مرتين ونتأكد هتحس ولا مش هتحس”.

 

وبالفعل كان جاي تجاهي بالمشرط قومت من السرير وانا بقوله “أنا حي والله حي مش جثة.. أنا إيه جابني هنا”.

 

لقيت مريم خطيبتي واقفة وعاملة نفسها مش عرفاني وبتقوله “ده تقريبًا عامل المستشفى يا دكتور.. شكله كان فاقد الوعي وافتكروه ميت”.

 

وغمزتلي بعنيها الشمال وهي بتكمل “يحرام ده شكله اتجنن من الصدمة ولا إيه.. أنت كويس يا استاذ؟”.

 

فهمت مريم بتلمح لأيه وقومت عملت نفسي مجنون فعلاً علشان أهرب قبل ما حد يمسكني وبقيت اقولهم “أبلة احلام بتولد، أبلة احلام بتولد.. العنكبوت جاب نونو راكب توكتوك”. 

 

وبقيت اقول في أي كلام عبثي وخرجت أجري من الأوضة كلها ورجعت البيت وأنا في قمة تعبي ومش فاهم لحظة من كل اللي جرالي. 

 

لقيت مريم بتتصل عليا، ما صدقت أنها خلصت وفتحت قولتلها “مريم، كويس انك اتصلتي أنا مش فاهم حاجة خالص.. إيه اللي حصل؟ أنا أخر حاجة كنت بسجل الفيديو وفجأة دخلت في دوامة وتخاريف غريبة”.

 

لتكملة اضغط على الرقم ٤👇👇

الصفحة السابقة 1 2 3 4 5 6 7 8الصفحة التالية