ريا وسكينة رجعوا من تاني

معرفش إزاي لقيت نفسي بقول جوايا “مفيش غير عم حسين، هحكيله وهو أكيد هيقدر يفيدني”.

ماكنش فيه غيره عمومًا يعرفني كويس وبقدر اتكلم معاه زي والدي الله يرحمه
نزلت بالفعل لقيته كالعادة قاعد في المحل بيصلي المغرب على كرسي
انتظرته لما خلص
وقالي “وشك مخطوف وبقالك يومين مختفية، مصيبة صح؟”.
قعدت وياه في المحل وقولتله وأنا بعيط غصب عني “بس مصيبة كبيرة اوي ياعم حسين، غير كل مرة”.

لما حس أن الموضوع كبير كده وباين عليا خايفة اتكلم، قالي أشد باب الدكان علشان محدش يسمع واطمن في الكلام.

عملت كده
وبدأت احكيله القصة كلها من بداية معرفتي بـ كريمة على السوشيال… لـ خطفها هي وزهرة بسبب إعلان الشغل الملعون.

معرفش ليه ملامح عم حسين ماكنتش مخضوضة، وكان هادي كأني بحكي له قصة وهمية.
خلصت وانتظرته يرد عليا،
ومقالش غير كلمة واحدة “افتحي الدكان واطلعي نامي”
!!!
لأول مرة أحس أنه مش مصدقني،
وشكلي وحش قصاده.
فتحت الدكان ولسه خارجة، لقيت شاب مبرق لي وبيقولي “هو الـ سمعته ده بجد؟؟”.

عمومًا ده مش غريب، ده سعيد النجار
اعرفه من واحنا عيال بنلعب بلي في الشارع.

ماكنتش قادرة اتكلم تاني،
ورد عليه عم حسين بدالي وقاله “اعتبر نفسك مسمعتش حاجة، ماحناش عايزين مصايب لبنتنا”.

طلعت البيت وانا المرادي متأكدة أن مفيش حد هيصدقني ولا يساعدني،
واني علشان ادور على صحابي لازم اغامر بنفسي.

الساعة جت أربعة الفجر وانا النوم طاير من عيني،
مش هقدر اعيش وانا ذنب البنات في رقبتي وساكتة عن غيابهم.
لبست ونزلت اتسحب وقت ما الناس كلها نايمين، وقولت لازم اكون قصاد العماير دي من بدري وأشوف كل الـ بيحصل هناك بنفسي لحد ما اوصلهم.

مكذبش على نفسي
كنت مرعوبة وانا ماشية في الشوارع في الوقت المتأخر ده
وحاسة اني مش هرجع تاني
لكني خلاص خدت القرار

وصلت المكان الملعون قصاد الكشك، لكن المرادي تعمدت مقفش في نفس المكان واقف في مكان أبعد شوية
لأني شاكة بنسبة كبيرة في صاحب الكشك أنه تبع العصابة

ساعة
ساعتين
أربعة
ولقيت الـ واقف جنبي بيقولي

لتكملة اضغط على الرقم ٥👇👇

الصفحة السابقة 1 2 3 4 5 6 7الصفحة التالية