ريا وسكينة رجعوا من تاني

واكتشفت أن صوت أم كريمة،
هو هو صوت الست الكبيرة ؟؟؟
معقول دي هلاوس!
كررت تشغيل التسجيل اكتر من مرة
وكل مرة بكتشف مدى تطابق الصوتين
ايوا
ده صوت الست المنتقبة
هي
أنا عمري ما شوفت أم كريمة قبل كده
معقول!
طب إزاي ؟
هل اتخطفت مع بنتها مثلا
وعملت كل ده من باب التمثيل تحت ضغط من العصابة ؟
جريت على الشارع،
ورحت لسعيد اول واحد وقولتله “تعالى معايا ضروري في كارثة”.
خدته وجريت على نفس العمارة
وسعيد طول الطريق مش فاهم حاجة
وبيسأل مبردش عليه
خبطت بكل قوتي على باب الشقة
وفتحت نفس الست، بتقولي “انتي تاني؟”
زقيتها ودخلت أنا وسعيد اقتحمنا الشقة
وقولتلها “فين كريمة وزهرة.. أنا عارفة صوتك.. أنتي أم كريمة الـ كلمتيني قبل كده”.
الست وشها بدأ يتغير للخوف
وشاورتلي على أوضة في ممر الشقة
سعيد قالي “متدخليش يا شهيرة.. هي تدخل قصادنا “.
مشيت قصادنا،
ودخلنا لقينا كريمة مربوطة على كرسي ايديها لورا
ووشها مرهق وشعرها متقطع
بتستنجد بيا وبتقولي “شهيرة..ألحقيني”.
إزاي!!
في إيه ؟؟
فكيتها وانا لسه مش مستوعبة حاجة، وسألتها “مش دي امك.. ازاي تعمل كده فيكي، وفين زهرة”.
ردت وقالت “في الاوضة التانية.. روحي فكيها بسرعة مفيش وقت”.
سيبتها وجريت أنا وسعيد نفتح الاوضة التانية نشوف زهرة،
لكن فجأة مجرد ما دخلنا الباب اتقفل علينا من برا.. ولقينا نفسنا في أوضة فاضية بلاطها مكسر وكلها رملة وكراكيب.
قعدت اخبط على الباب واصرخ واقول “يا كريمة ألحقينا بسرعة”.
لكن سمعت صوت ترابيس بتتقفل علينا، وصوت كريمة بتقول لأمها “بس احنا اتفقنا نصتاد اي بنت تضايقني وتحسسني أنها أحسن مني زي زهرة.. الراجل ده بقا هنعمل فيه إيه ولا مين هيقدر عليه أصلا”.
ردت الام وقالتلها “خليهم محبوسين زي الفيران كده لحد ما ينشفوا من الجوع وندفنهم جنب الأحباب”.
أنا وقعت في ورطة كبيرة
ودبست معايا شخص ملوش اي ذنب
كل ده بسبب صحاب السوشيال
والامان السريع الـ بديه لأي حد أعرفه
معرفش ممكن نموت هنا من ريحة الاوضة البشعة،
ولا ممكن تحصل معجزة ونلاقي الـ يدور علينا!


