ريا وسكينة رجعوا من تاني

“أنا رجلي وجعتني م الوقفة، معتقدش هنلاقي دليل بسهولة كده”.
اتصدمت
وقولت “سعيد؟؟ انت ايه جابك هنا وازاي”
رد وقالي بابتسامة سمجة “معرفش.. كنت لسه قافل الدكان ومروح لقيتك ماشية تتسحبي زي القطط، حسيتك بتعملي بلوة جديدة خصوصًا بعد الـ سمعته، قولت اجي وراكي بدل ما تختفي انتي كمان ومنلاقيش حد يسدد اقساط الانتريه الـ عليكوا”.
وبرغم صدمتي في وجود سعيد
إلا أني اطمنت شوية بوجوده
ع الأقل أنا مش لوحدي
ولو اختفيت
هلاقي الـ يدور عليا.
الكشك كان فاتح
والناس في الشوارع بدأوا يظهروا
شوية وانا بتكلم مع سعيد وبشاورله على التلت عماير المشكوك فيهم
عيني جت على واحدة خارجة لابسة نقاب من عمارة فيهم!
معرفش دي واحدة من الجيران عادي
ولا إيه
بس اقترحت في وقتها لسعيد إني أروح أتكلم معاها يمكن تفيد بأي معلومة عن الـ بيحصل.
لحد ما البنت دي راحت وقفت عند الكشك،
قولت لسعيد “اقف انت هنا لحد ما اتكلم معاها بدل ما تخاف من وجودك وتفكرنا نصابين”
قربت من البنت
ولسه بقرب منها
وقع من أيدي التليفون
بجيبه من الأرض
وعين وقعت بالصدفة على جزمة البنت؟!
دي جزمة كريمة؟؟
معقول هي؟
كنت هجري عليها من اندفاعي
لكني خوفت
خصوصًا أن جسمها مليان شوية عن كريمة،
رجعت بضهري وانا بتمنى متشوفنيش ولا تحس بيا.
سألني سعيد لما شاف وشي مخطوف “رجعتي ليه ”
شاروتله بخوف وقولت له “دي دي .. دي جزمة كريمة صحبتي.. “.
اندهش وكان عايز يروح يمسكها
لكني منعته،
وقولتله “احنا هنخليها ترجع، ونمشي وراها.. متنساش أن زهرة معاها ولازم نلحق الاتنين”.
خلصت البنت مع الكشك
ورجعت تاني دخلت العمارة الـ على الشمال!!
مشيت وراها أنا وسعيد
ودخلنا على طول اول ما دخلت هي
بس كنت حذرين جداً أنها متسمعناش
خليتها تسبقنا بدور
وطلعنا وراها على السلم
وصلت للدور الرابع
وسمعت صوت باب بيتقفل
عرفت انها دخلت فيه
طلعت أنا وسعيد نجري
ولسوء حظنا كانت العمارة متقسمة على أربع شقق؟!
وقفنا نبص لبعض
مش عارفين نخبط على مين فيهم!
وقبل ما ناخد اي قرار
اتفتح باب شقة منهم، وخرجت ست كبيرة بتقول “انتوا واقفين كده ليه ؟ انتوا حرامية ولا إيه”.
لتكملة اضغط على الرقم ٦👇👇


